صفحة المغتربين

رح احكيلكن عن الغربة باللهجة القميناسية بشان ما يكون فيها تكلف ابدا
اشو بدكن بالطويلة مالكن غير القصيرة اول شي خطر ببالي بعد ما تخرجت من المعهد انو سافر لبرى بشان الجيش قلنا منسافر كام سنة ومندفع بدل للجيش ومنستفيدلنا بكام ورقة بالمرة المهم سافرت على السعودية ولما باشرت بالشغل لقيت الراتب ما بكفي حتى مصاريفك قلنا يالله شطبنا اول حلم وهو دفع البدل تضحكنا على حالنا وقلنا يالله بعدين مندفع المهم شوي شوي لقيت الخطورة بالغربة وهيي انو ما بتشعر بشي ما بتشعر بصباح ولا بمساء ولا حتى بطعمة كاسة شاي وانطمس على عقلنا وسلمنا للامر الواقع المهم قعدت قعدة وحدة سنتين وشهر ونزلت اجازة وهون المفاجأة انو الناس اللي كانو معي كلن خلصو جيش واتجوزو وصار عندن بيوت فكرت وقلت اشو استفدت انا من الغربة ولا شي لا بشان ما يصير كذب استفدنا انو صرنا نعرف كافة انواع عدم البسط بالحياة والحمد لله وهيك رجعت من الاجازة ورجعنا لنفس الروتين اللي بتفيق من الصبح ما بترجع لاخر الليل و بعدي عليك اليوم بتحسو سنة غيرنا لهجتنا وغيرنا تفكيرنا وغيرنا كل شي فينا حتى نحسن نتفاهم مع الناس والله اني مشتاق اقعد تحت السجر بايام الصيف واشرب كاسة شاي اكروك عجم هذا كل اللي بتمناه بس انا خايف من شغلة وهيي فوات الاوان ما منرجع الا بتكون نفسيتنا اتغيرت بس انشاء الله ما بصير فينا هيك وانا اسف عالاطالة والسلام عليكم ورحمة الله وبركاته